جاتوة التشوكليت كيك

السلام عليكم ورحمة الله وبركاته


اتفرجوا الأول





ها
ايه رأيكم




التشوكليت كيك


طبعا انا عملت التشوكليت كيك دي بالطريقة الأولى
المعروفة
بس بالزيت بس

عدلت شوية في المقادير

عموما المقادير مرة تانية والطريقة كمان

مقادير الكيك


5 بيضات
2 كوب كبير دقيق
1 كوب سكر
فانيلا
نصف كيس بيكنج باودر

معلقتين طعام زيت ذره

انا طبعا عملتها كلها بزيت الدرة لأنه اطعم واخف
يعني علشان ماتبقاش دسمة اوى بزيادة
جربت اعملها من غير سمنة بلدي
وفعلا زيت الدرة بيدى طعم روعة

وبلاش زيت العباد علشان طعمه مابيكونش حلو اوى في
الكيك
خصوصا التشوكليت كيك

مقادير الصوص


مج كاكاو خام
مج ونصف سكر
مج لبن
مج الا ربع زيت درة
كيس فانيلا

لو تلاحظوا هنا انا استخدمت مج الا ربع زيت مش مج كامل
لأني عايزة الخليط اخف شوية ((علشان زيادة الوزن ))
وفي نفس الوقت تقيل جدا جدا (( في السمك ))


للتزيين

ظرف واحد كريم شانتي
شيكولاتة فارماسيل
بندق مطحون ناعم جدا

طريقة عمل الصوص


في الخلاط الكهربائي نضرب السكر مع الكاكاو مع
الفانيلا مع اللبن والزيت
لحد ماكله يدوب مع بعضه والقوام يكون تقيل

ناخد من الخليط مج كبير شوية نحطه في الفريزر على
مانخلص الكيك

باقي الصوص هنستخدمه في عمل الكيك

طريقة عمل الكيك


في نفس الخلاط هنضيف البيض ونضربه كويس مع الصوص
الباقي
بعد كده نضيف السكر والفانيلا ونضربهم شوية في الخلاط
بعد كده نضيف معلقتين الزيت ونضربهم كويس

في طبق تاني غويط
ننخل الدقيق مع البيكنج باودر مرتين

ننزل على الدقيق بخليط البيض والسكر والصوص
ونضرب بالمعلقة الخشب في اتجاه واحدونقلب كويس من تحت لفوق لحد ماكله
يتجانس مع بعضه

طبعا نكون داهنين الصينية بالسمنة ورشينها كويس جدا
بالدقيق
ونكون مشغلين الفرن على درجة حرارة عالية من قبل مانبدا في عمل الكيك


نصب خليط الكيك في الصينية
ندخلها الفرن وبعد 10 دقائق نهدي درجة حرارة الفرن ونسيبها تستوي

بعد مرور 1/2 ساعة نختبر الكيك بالسكينة او خلة
اللأسنان
لما تستوي نطفي الفرن ونطلعها برا الفرن ونغطيها بالفويل ونسيبها تبرد
وتعرق مع نفسها علشان تفضل طريه




طريقة التزيين


بعد ماتبرد الكيكة
بنشيل الحروف بتاعتها علشان الصوص ينزل في المسام

نقسم الكيك لنصفين
ندهنها بجزء من الصوص لحد مانغطيها كلها

بعد كده نحط طبقة الكيك التانية ونغطيها بالصوص

هيتبقا شوية صوص تقيل
ناخد منه معلقتين نحطهم مع ظرف الكريمة بس بعد مانخفق الكريمة للتزيين
النهائي

وهيتبقا صوص قليل جدا جدا بواقي في المج
هنضيف ليه شوية لبن نخففه شوية

ونلاحظ ان لونه هيكون افتح
مع معلقتين كريمة من اللى خفقناها
وشوية بندق مطحون ناعم جدا
ونعمل خطوط على الكيك
هتعمل معانا لونين

ملحوظة

طبعا انا قطعت الكيك الأول
مستطيلات زي الجاتو
بعد ماعملت على الكيكة كلها باللون الأفتح
وزينت كل واحدة بشكل مختلف بوردات الكريم شانتيه
المخلوطة مع الصوص

بعد كده بنزين بوردات الكريم شانتي والشيكولاتة
الفارماسيل









انا كمان جبت الورق البلاسيه بتاع الكب كيك وفردته
وعملتهم زي مايكونوا قطع جاتو بالظبط
وقدمتهم




ملاحظات عامة قبل البدء في
عمل أى كيك

* دايما احرصي انك تنشفي
البيض كويس جدا قبل ماتبدئي في عمل الكيك

* الوعاء اللى تعملى فيه اى
كيكة لازم تتاكدى ان هو ناشف

* ماتخرجيش من جو المطبخ
يعني مثلا ماتعمليش الكيكة في الصالة او في اى
اوضة وبعدين تدخلى تكمليها في المطبخ

* حافظي على جو المطبخ
لو فاتحة شباك ماتقفليهوش لحد ماتنتهي من عمل
الكيكة
ولو قافلاه ماتفتحيهوش

* انخلى الدقيق مع البيكنج
باودر دايما مرتين هيديكي نتيجة هايلة

* الدقيق اللى تستخدميه لازم
يكون مخصص للكيك والتوتات يا اما يكون دقيق متعدد الأغراض

* السكر اللى تستخدميه في عمل
الكيك لازم يكون ناعم حبيبات
يعني زي سكر الأسرة مثلا في مصر

* لازم الكيك علشان يدي معاكي
نتيجة كويسة مايتعداش نصف الصينية
وفي نفس الوقت مايكونش اقل من منسوب نصف الصينية اوى
الا حاجة بسيطة
علشان يطلعلك نتيجة حلوة