المقادير ياستي سهلة: لانها الكيك اللي بتفضليها يعني اي نوع كيك تحبيه فل كده!!! بس في قالب مربع كبير الحشو جوا الكريمة : برضه اللي تحبيه واولادك يحبوه الحشو اللي في الصورة كريمة البندق واللوز متلونة بلون اخضر
نبدأ ببقي في التكنيك بتاع التورتة ( كلام الشيف حسن وياجمالو ياجمالو )
اولا هقسم الكيكة المربعة لنصين من النص ونقطع كل نص لطبقات متساوية وع شكل مستطيل
2- هنحشي بين كل طبقة والتانية الحشو والكريمة اللي انتي عايزاه وهنا مستخدمين كريمة البنق واللوز وحطين لون عليهم
بعدين هنحاول نثبت الطبقات بأي حاجة مثلا لو فيه عصيان خشب بتاعت الشوي ممكن تساعد برضه
بعدين هنكون مكررين نفس الخطوات اللي فاتت في طبقات نص الكيكة التاني
وبعدين نحط كل الطبقات علي بعض ونثبتهم جاااامد كده
هنبدأ بقي بسكينة رفيعة اننا ننحت الكيكة من عريض لرفيع زي جسم سبونج بوب او اللي يحب يفضل زي ماهو اوك وبعدين ندهن كل الكيكة بأي نوع كريمة تحبيه كريمة زبدة - كريمة بندق - نوتيلا اللي تحبيه او حتي كريم شانتيه بالشكل ده
بعدين بمعلقة الايس كريم او اي معلقة مدورة هنعمل ع اطراف الكيكة من فوق فجوات زي جسم سبونج بوب
بعدين بقي المرحلة اللذيذة جدا وهي وضع الفوندان علي الكيكة وطبعا مقادير الفوندان (مارشيمللو هيتم تسييحه وعليه سكر بودرة ويتعجن بشكل كويس اوي ) والالوان الطبيعية للطعام نجيب الاصفر والازرق هنحط بقي الطبقات بتاعت الفندان الاصفر ع كل الكيكة بس بالراحة وبالضغط الخفيف عشان ميبقاش فيه هوا بين العجينة والكيكة بتاعتنا ونربطهم ببعض كويس اوي
بعدين لو عندك سكينة رفيعة او مقشرة ممكن تععملي شريط من الشيكولاتة عشان نعمل بنطلون سبونج او نحط كاكاو ع عجينة الفندان ونعملها بني ونقطع ع شكل البنطلون
ونعمل برضه بالعجبينة البيضا شكل القميص يعني شريط مستطيل كبير وفيه مثلثين صغيرين ع شكل ياقة القميص ونعمل بعجينة بللون الاحمر او حتة قطعة فراولة او كريز تبقي الكرافتة بتاعته ونعمل بكوباية صغيرة عندنا دايرتين لونها ابيض لعنين سبونج ودايريتين اصغر منهم باللون الازرق وبأي معلقة عندنا او النشابة ندوس بالراحة ع جسم سبونج عشان نعمل فجوات الموجودة في جسمه
بعدين نلعب بقي بالعجينة عشان نعمل بؤقه وسنانه وانفه ورجليه واعتقد عرفنا اللعبة خلاص وسهل نعملهم
وده شكل تورتة سبونج بوب لاعياد ميلاد اولادك وبجد هتعجبهم اوووووووووووووي وهتفرحي انتي اكتر لما تشوفي الفرحة الكبيرة في عنيهم
الأحد 26 أبريل 2015, 01:58 من طرف KKHAL
موضوع: تورتة الاسبونج بوب لعيون اطفالنا الحلوين 
