حياتنا بقت كلها إكسباير

بسم الله الرحمن الرحيم
إكسباير !!!!!

إكسبايار !!

في يوم خفيف لطيف .. كنت في إحدى المصالح الحكومية ..

وكالعادة وقفت في طابور طوله 2 كم

.. ولكن والحمد لله أخيرا نجحت في الوصول للشباك بعد 84 دقيقة من الانتظار:

: .. لأجد الموظف الذي يرتدي نظارة كوباية (وليس كعبها فقط) .. ينظر لي من تحتها بقرف ثم أخرج صوتا لا أعرف من أين خرج :

- أوراقك ؟

- اتفضل يا باشا .. أوراقي كلها جاهزة وسليمة

أخذ الأوراق وهو يواصل تلك النظرة المشمئزة .. ثم بنفس الصوت الغير معروف مصدره :

- بطاقتك ؟

- اتفضل

أخذ البطاقة ثم قلبها ودقق النظر .. ثم ألقى أمامي الأوراق والبطاقة قائلا :

- بطاقتك إكسبايارد يا أستاذ .. اللي بعده

:

- استنى استنى .. دانا ما صدقت وصلت للشباك .. إيه اللي بتقوله دة ؟

- بقول لك بطاقتك إكسبايار .. يعني منتهية الصلاحية .. انت ما بتفهمش فرنساوي ولا إيه ؟

قولتله : لا يا اخويا كفايا انت بتفهم

- هو إيه دة يا عم .. هي برطمان مربى ؟!! منتهية الصلاحية إزاي يعني؟

- انت ما سمعتش القانون الجديد ؟ .. صلاحية البطاقة 7 سنوات

- طب ليه كدة ؟ .. هي بتحمض يعني ولا إيه ؟

- انت بتهرج ؟ .. دة القانون يا أستاذ

- طيب حضرتك أنا معايا باسبور .. ينفع ؟

- يووه .. لأ ما ينفعش

- إزاي ؟ .. دانا ممكن أستخدمه في أي دولة بالعالم

- قلت ما ينفعش .. روح اعمل بطاقة جديدة وابقى تعالى

- ماشي .. حعمل بطاقة جديدة .. وحبقى أحطها في الثلاجة أو حتى الفريزر عشان ما تحمضش

=====================

خرجت وأنا مخنوق جدا

.. كل يوم نتفاجئ بقانون جديد يعكنن علينا

.. وطبعا مش عايز أقول لكم الزحمة كانت قد إيه عشان أطلع بطاقة جديدة

.. ما هو طبعا كل الناس بتعمل بطايق جديدة بدل البطايق الإكسبايرد (( يعنى منتهى الصلاحيه ))

فضلت أفكر في الموضوع دة لغاية ما وصلت البيت .. لقيت عم حسن جارنا قاعد
مقرفص قدام البيت .. وحاطط إيده على دماغه وحالته تصعب الكافر .. قربت منه
:

- إيه يا عم حسن ؟ .. مالك؟

- آاه .. خلاص راح .. بعد العشرة الطويلة سابني وراح

- معلش يا عم حسن .. كلنا لها .. الأعمار بيد الله .. بس هو مين اللي مات ؟

- لا يا أستاذ .. محدش مات .. أنا بتكلم عن التاكسي بتاعي

- التاكسي ؟ .. ماله ؟ .. عمل حادثة ؟

- يا ريت .. دة زي الفل والله

- أمال فيه إيه بس ؟

- خلاص .. بقى إكسبايارد
- معقولة !! .. برضو ؟ .. إزاي يعني ؟

- دة القانون الجديد .. خلاص أي تاكسي من أيام التمانينات بقى إكسبايارد .. وبعدين العربيات كمان
- طب ليه كدة ؟

- لسة فاكرين إنها مضرة للبيئة .. قال يعني إحنا خلاص حلينا كل مشاكلنا ومافاضلش غير دي
- معلش يا عم حسن .. يتعوض برضو

- يتعوض إزاي بس .. دانا بقالي 30 سنة شغال عليه وهو زي الفل .. يعني أسرح بتوكتوك على آخر الزمن ؟

=======================

سبت عم حسن ودخلت شقتنا وأنا لسة بفكر في القوانين الجديدة بتاعة الإكسبايارد دي .. لقيتالمدام بتقول :
- انت جيت .. إزيك .. بقول لك .. عايزين نشتري تليفيزيون جديد
- ليه يا ماما ؟ .. هو بتاعنا بقى إكسبايارد ؟
- آه .. انت قريت الخبر ولا إيه ؟

- لا ما قريتش حاجة .. أنا كنت بهزر

- طب امسك الجرنان دة واقرا

لقيت خبر في الجرنان إن التليفيزيونات القديمة مش حتبقى شغالة من سنة 2010 .. لأنهم حيركبوا نظام رقمي

- شفتوا .. كل حاجة في البلد بقت إكسبايارد

- آه ياناس .. مش بعيد يقولولك ابقى هاتلك أم جديدة او اب جديد عشان بقو إكسبايارد

.

. ولا حتى يعملوا فترة صلاحية لكل واحدة .. وجوزها يغيرها بعد كام سنة
- آه .. ولا يحددوا عمر لكل بني آدم لو عداه ياخد إعدام ..
أصلنا خلاص
بقينا إكسبايارد !!!

يا فرحه امنا بينا كلنا هههههه

قولولى رايكم يا معلمين ويا بونائدمين

المنطقه والقهوه

وعاوز الكل يشاركني الرأي والا هاعتبره اكسباير

يسلموووو العمدة

دمتا بود ...

» سلسلة (علامات الساعة هل حصلت كلها ام لا)
» فاروق حسني: لولا وزارة الثقافة لكانت مصر كلها منتقبات وملتحين
» بالفيديو.. "أنكرها كلها تماما" شعار أسرة مبارك أثناء المحاكمة